肥龍の家

我返咗黎啦!!!大家好耐都冇見到我寫blog呢!其實我一直都暗地裡寫咋，之不過我冇公開俾大家睇呀!

今次寫返blog，係因為個人定下來，先有心機寫咋!之前唔係瞓就食，連街都少出去，原因只得一個，就係小怡肚裏面多咗個小龍呀!今日終於5個月啦，之前3個月真係好辛苦，成日都想嘔，嘔又嘔唔出，行一陣街就攰到死，又早瞓過人，所以一放工就返屋企休息囉!

之前真係好緊張，不過到咗宜家5個月，終於感覺到bb係肚裏面踢我，個心就定咗好多了。原來大肚既時候，心裡面真係好多問號架!有咩唔做得，有咩唔食得，咩時候做檢查，通通都係問號。但原來身邊既朋友都有問號架!佢地既問號就係估緊我肚裡面係bb仔定bb女呀!雖然我o係17週已經知道，不過我都冇全部公開，因為我覺得bb仔同bb女都冇所謂，最緊要就係健康(係真架!!!)不過好奇怪，因為我身邊既朋友都非常喜歡bb仔，所以佢地都唔太相信我地。

好了...我下次先繼續寫了，不過唔會post相住，因為我肥到驚你地認唔到，以為睇錯人地既blog呀!

上兩個禮拜，我隻狗bibi真係令人擔心，差點就見唔到佢了。前兩日媽咪見到佢嘔咗幾日，咪帶佢去睇醫生囉，醫生話佢生咗幾粒瘤，其實我地一早就知道，之不過佢年紀真係太大，我地已經養咗佢16年了，所以我地決定唔同佢做手術，而醫生都好贊成，所以都將佢送回家，而醫生話如果佢好辛苦就帶返來人道毁滅啦，嘩!果幾日我地成家人都無心機，媽咪仲流咗好多眼淚，日日都望住佢，好驚佢會離開，點知道過咗幾日，佢好似回光反照咁，仲食番野同埋行得添，真係好出奇，我諗佢可能見到呢幾日既父愛同母愛，令佢感動到唔捨得走呀!

唉!過咗幾日，又到隻小狗gigi病了，醫生話佢生咗幾粒膀胱石，要做手術添，初時媽咪問我地幫唔幫佢做手術喎，因為成6千蚊呀!唉!!!其實點會唔做呀，我地咁鍚佢，終於比佢接受手術。醫生話手術好成功，做咗半日，過多十幾日返去覆診。我們終於安心d啦，不過媽咪話以後都唔想再養狗了，因為如果見到佢地病咗同埋離開我地，果種傷心就好似親人離去一樣，所以我好希望其他人養狗記住要三思呀!

老公終於出咗report喇，好彩個心臟冇事呀!只係膽固醇好高啫，希望佢會戒口啦!不過我就可憐喇，足足病咗一個星期，瞓覺…瞓覺…再瞓覺，d鼻水流過不停，連聲都變埋，簡直病到人都顛。雖然病到不似人形，不過今個月都着數唔少，因為月頭放咗幾日假，月尾又放咗3日病假，好似成個月返得半個月工咁。

本來醫生仲比多一日病假架…不過唔知點解個心好似過意唔去，所以都係帶病返工囉，連老公都話我short short地。返到公司老闆仲問我點解唔放多一日，我講笑咁話:我再唔返工，我驚連我個位都比人坐埋呀!今日都差唔多好得9成，希望哩一年都唔好再病啦!

今晚淨得我一個人睡，原因就係老公要入院做檢查，其實幾個月前老公都應該去檢查一下，因為佢成日都話個心有時拿住拿住痛，而且個心跳的好快。不過老公一直懶懶行，直至係7月中去九州旅行既時候，佢既心臟好似更加唔舒服，所以先拎起心肝去睇心臟醫生，最終今日要入浸會醫院了。

所以今晚淨返我一個人睡，雖然有少少悶，不過我諗擔心比悶既多。到咗第二朝，老公話原來要注射顯影劑入血管內，然後再做掃描，佢話當注射後，成個身都發滾，真係好得人驚呀!希望佢聽日睇報告冇事啦!小心身體呀!