泡泡茶樂園

新家大致上搬遷完成勒, 今次已經係第3次搬家, 麻煩大家真係唔好意思呢, 歡迎到 http://hk.myblog.yahoo.com/bubblestea520 繼續參觀 "泡泡茶樂園"啦, 而呢個blog我亦會繼續保留, 而且又要繼續收留我d小水滴呢, 如果你地要搵我或者唔方便0係yahoo留言的話亦可繼續0係呢度留言,我會時時check住架, thx

新家地址 : http://hk.myblog.yahoo.com/bubblestea520 (第三代)
舊家地址 : http://www.wretch.cc/blog/bubblestea (第二代)
舊家地址 : http://www.wretch.cc/blog/twinstarstea (第一代)

hi, 多謝各位既留言同關心, 雖然仲有好多掛念同唔捨得, 但我已經好返好多, 同媽咪出街, 飲茶, 同朋友出街食飯, 整蛋糕咁架勒, 我承認我懶, 冇一一回覆, 不過每一個留言我都有好仔細咁睇, 我仲有睇哂你既blog架, 不過都係果句, 懶, 未去到留言添, 不過我會慢慢逐個拜訪留下言架勒,  希望你地仲記得我啦, 而且其實我都開始返整我最愛既甜品架勒, 遲d慢慢再一一post上黎同大家分享先, 點解要遲d呢, 因為...........

我想搬屋呀, 我想將"泡泡茶樂園" 搬去yahoo blog勒, 其實都幾矛盾, yahoo blog唔算得上係一個好齊全既blog, 唔可以玩blog小玩意, 唔可以養我果幾隻小水滴, 唔可以將自己個blog粉飾得天花龍鳳, 唔可以放我喜愛既(不是yahoo blog)放0係yahoo 裡面, 而最大既問題就係冇login yahoo冇登記既朋友唔可以留言, 呢個係最大既一個麻煩, 數了種種缺點, 點解我仲有咁既打算呢........嗯, 自己都唔識解釋添...或者佢既吸引處就係越黎越多香港人用, 香港人用返香港既yahoo blog親切感會大d, 大部份明星又係用緊yahoo blog (我呢d八卦妹成日都睇既, 特別係古巨基果個), 又有d朋友又轉左yahoo blog, 橫掂要login入去留言, 就諗不如我自己都轉啦, 而且yahoo blog 可以無限上載相片(雖然每個月係有quota, 但我每個月應該唔會過10mb卦), 又或者係貪新鮮, 想轉換下新環境, 仲有就係, 無名實在唔太穩定, 而且佢總容量暫時都係120mb, 長遠黎計對我黎講唔可以放咁多pinky相實在太可惜勒

所以, 呢個blog應該暫時唔會再update架勒, 其實我早前都整左好多野想同大家分享既, 不過諗住留返0係新blog先啦, 但同時亦對冇yahoo login朋友唔好意思, 知道你地有心會來泡泡茶樂園留言, 但轉yahoo後就比較麻煩lu,真真真係唔好意思, 或者希望都會見到你地齊齊login, 或者齊齊轉下新環境玩下啦, 現在我正努力為新家粉飾一番(其實都只係轉下背景, 執下link之類), 到正式執好既時候再通知你地, 希望轉左yahoo後你地都會繼續支持 "泡泡茶樂園", 留唔到言既朋友唔緊要架, 你地來探我我已經好開心架勒, 而呢個無名blog我當然都會繼續keep住啦, 因為我要用黎養返小水滴, 同埋要keep住咁多朋友仔既link, 等我呀~

爸爸既喪事, 大致上都完成了, 第一日以為自己好叻, 一直都冇喊過, 而且已接受成為事實勒, 情緒亦慢慢平復中, 見到咁多屋企人, 朋友到來, 為爸爸覺得好安慰, 好感動, 第二日終於忍唔住了, 最後一刻望住爸爸, 親手抱著爸爸既大相, 不捨得地親手按下那一個制, 好激動, 看著爸爸既大相, 爸爸雙眼眼紅紅的, 究竟係我地揀相時察覺唔到爸爸那紅紅的雙眼, 抑或是爸爸想透過相片表達佢對我地既不捨得呢? 睇到那些香燃燒後會自動彎曲的, 他們說, 正代表爸爸感到安心同滿意, 那蠟燭的蠟滴下來如水珠般流淚, 他們說, 正顯示爸爸正在流淚, 十分唔捨得…..但可以肯定既係, 我地一定好唔捨得爸爸, 喪禮上, 見到好多好耐冇見既舊街坊同親戚, 爸媽既老朋友, 屋企人, 朋友等, 仲有好多義務為爸爸誦經既人, 那些師傅話, 生命長與短係天註定, 但那小小既靈堂, 竟堆滿咁多人, 那是爸爸既福份, 我完全感受到師傅所講既說話, 我相信爸爸都一樣感受得到, 每一位到既人有心了, 好感動, 好溫暖

呢幾個月黎感受好深, 有好多既唔開心, 但當中亦有開心既, 同時亦令我短時間醒覺好多, 睇清楚好多, 迫使我長大, 將眼光擴闊, 人既生命真係好脆弱, 上天要帶走你, 隨時都可以, 無論你做d乜, 都好難改變事實, 健康好緊要, 冇左健康, 等如乜都冇, 錢再多亦不能帶走, 另外真係要好好珍惜依家擁有既野, 特別係屋企人, 同爸爸講過, 我一定會好好照顧媽咪, 睇住屋企既, 我一定會努力做好, 仲有及時行樂, 有得玩, 盡情玩, 想買野, 有能力又冇付擔既就買, 最緊要生活得開心, 咁先唔會浪費生命

朋友原來對我黎講真係幾重要, 簡單打來關心一句, 對我來說已經係無限既溫暖, 亦令我更加睇清楚身邊更多人, 有真誠既, 有假意既, 有極之感動既, 八卦既, 有冷淡既, 有體諒既, 有不聞不問既, 全部我都感受到, 當中有令我溫暖既, 亦有令我心淡既, 同時亦另我反思, 究竟係我一向付出唔夠多呢? 經過今次令我更清楚知道, 做人真的不能太執著, 對我好既, 我會努力對返你地好, 唔好既, 唔緊要, 亦唔可以要求人地做d乜, 付出d乜, 唔好記著失去既, 永遠只係記著我得到既, 簡單就易滿足, 易滿足就易開心, 或者呢幾句就係我呢世人最應該學既野, 雖然真心既朋友唔多, 但有心既真係好有心, 好想趁此特別多謝佢地, 有次我0係街時失控地喊, 朋友陪我返屋企; 有朋友常常打黎慰問我, 聽我喊, 聽我訴苦, 陪我去探爸爸, 甚至乎出席埋我爸爸既喪禮, 你地知道嗎? 我真係好感動, 喪禮上當日見到你地, 真係覺得好溫暖, 好感動, 令我有種想走黎攬住你地既感覺, 哈哈!! 另外亦估唔到只係隨意講左一句, 你地竟周圍幫我搵呢本書…

書一早已看完, 最精彩既, 最令我深刻既, 就只有呢版, 我永遠都會好記得, 識到你地我真係好開心, 有你地我好感動,  除左講多謝同感動外, 其他野我唔識講, 只係希望你地都感受到我份心意, 好朋友我自問唔多, 但心底裡面, 我當你地係我既好朋友, 你地所做既野, 我一定會好好記0係心


另外有朋友送我筆, 仲有孖寶音樂小擺設, 多謝你, 仲有其他朋友, 同事既心意, 我統統都收到, 都好多謝你地, 仲有0係度留言既每一位朋友, 你地每一篇留言我用心反覆睇左好多次, 有同我分享既, 有鼓勵我既, 我會好好記著, 多謝你地, 我會努力帶住屋企人向快樂之路進發架勒, 過新生活, 我希望所有關心我 祝福我既朋友同樣一樣過得開心快樂

Hi, 各位好嗎? 太耐冇update唔好意思, 表面上恢復很多, 一切如常似的, 心底裡面仍然記掛著太多, 短短半年既時間, 很多事都變得不一樣, 容許我最近幾篇將會比較長, 甚至比較悶, 但呢段時間確實令我有很深既體會同領悟, 好想透過屬於我自己既blog抒發一下…. 

事源半年前, 爸爸發現患了cancer, 對我地一家人黎講, 真係極大既打擊, 心裡面不斷問…點解要揀我爸爸? 可怕既癌細胞擴散得好快, 完全沒有稍為好轉既跡象, 經常進進出出醫院, 本身有個肚腩仔既爸爸只見骨瘦如柴; 本身愛吃好野既爸爸續漸由食正常餐轉為只能吃粥水, 再轉插胃喉吊奶, 佢既痛苦, 深深刻在我心裡面, 更難過既係我地卻無能為力, 曾經努力搵好多坊間能治癌症既配方, 甚麼中醫, 蔬菜湯, 十穀粥等都試過了, 可惜完全沒有效用, 除左多d陪佢外, 可以做既實在唔多…..好無奈好無助好痛… 

另外婆婆亦有肺癌, 近呢半年同時間更每況越下, 內疚地因為要照顧爸爸, 我地照顧婆婆既時間真的不多, 婆婆亦變得骨瘦如柴, 又係食唔到野, 甚至乎飲啖水都有一定既困難, 每一次見佢同樣覺得好心痛, 心想 : 難道上天認為我還未學識痛苦嗎? 還未學識珍惜嗎? 要維持到幾時呢? 痛苦早在拍拖時已學識, 雖然情況不同, 但痛苦程度真的不少, 但”珍惜”呢兩個字, 我自問不斷學習緊, 真係學得太慢嗎? 3月頭, 婆婆終於捱不住離開了, 離開當日, 為了暫代媽媽既位置半日, 等媽媽可以去睇婆婆, 我不能離開爸爸半步, 忍痛地不能到醫院見佢最後一面, 只能留待喪禮上, 好痛, 好無奈, 而我亦知道爸爸都好唔開心, 好想去睇婆婆, 佢怕人地怪責佢, 太傻了… 

婆婆 : 我地永遠都會咁掛住你, 希望你可以同公公重聚啦


4月頭剛完成婆婆的喪禮, 緊接著便到爸爸….. 臨走前兩日, 胃潰瘍痛得很厲害, 照胃鏡當天, 我地因要出席喪禮亦不能陪伴著爸爸, 好可憐, 喪禮後兩日, 爸爸亦被帶走了, 看著佢好辛苦, 但仍努力地為自己爭取留在世上的一口氣, 可恨上天堅持要帶佢走, 好痛好痛, 好唔捨得, 知道爸爸一向喜愛吃喝玩樂, 愛打扮, 一定不甘心離開, 好多佢想做既事未做, 好多好野食未帶佢去試過, 應承左帶爸爸去北京旅行, 未去, 應承陪佢上大陸, 未成行, 還未送回生日禮物比佢, 一切一切一早約定好爸爸留待佢好返時一一兌現, 我地拼命地嗌住爸爸, 捉住爸爸, 好讓佢0係我手心留多一陣溫暖, 亦好讓我地0係佢身上留一陣溫暖, 佢留下一滴淚就離開了……….我覺得爸爸好堅強, 好叻, 好努力, 一直以來佢都冇放棄, 好樂觀, 深信自己一定會好返, 我以爸爸為傲……27,28號將會係最後一次親眼見到爸爸, 既渴望見到爸爸, 但心裡面有十萬個不情願不捨得, 深知道過了這兩日後只能靠腦袋好好記住…….從來未寫過信比爸爸, 好想寫一封信比爸爸………. 

老豆 : 
唔知你會唔會睇到我呢封信呢? 你知道嗎, 你0係我地心目中, 你已經係一個好叻, 好勇敢, 好堅強既人, 你好叻仔呀!!! 深知道你呢個病係好痛苦, 但你一直都好樂觀, 好堅強, 冇放棄, 忍耐, 有你呢個爸爸, 我真係覺得好驕傲, 失去你才醒覺, 你0係屋企裡面默默付出左好多, 所有家庭用品, 家居清潔全部都係你負責, 有你, 廚房都特別立立令, 屋企特別乾淨架, 你愛乾淨, 多得有你成日督促我執野, 我成日整亂哂間屋, 你又幫我地執, 好多謝你呀, 以後, 你既說話我會好好記住, 我會提住自己, 減輕媽咪既負擔架勒, 你知道嗎, 我地真係好唔捨得你, 好好好掛住你呀, 好遺憾帶唔到你去旅行, 陪唔到你返大陸, 今年亦送唔到生日禮物比你, 知你鐘意玩, 鐘意食, 鐘意買靚野, 又送唔到比你, 但真係好想你知道, 我地真係好想好想做架, 無奈地, 上天妒忌我地, 或者覺得你較堅強, 所以堅持帶走你, 好對唔住, 但我應承你, 我會好好照顧媽咪, 多d陪佢架, 你放心丫, 我地兩姊妹大個女勒, 識照顧自己, 識照顧媽咪, 你唔使擔心我地, 我知你特別擔心我健康, 因為我唔節制, 我知道, 我會改架, 你放心丫, 我會好好愛惜自己架勒, 同時, 我得閒都會去睇下女麻女麻, 你唔使擔心啦, 你想去既地方, 你盡情去丫, 盡情玩, 唔使擔心我地, 唔使有牽掛, 我只想0係遠方既你, 可以開開心心咁生活, 唔使再有痛苦同折磨, 咁我地就好開心架勒, 總有一日, 我地終會相聚架 

老豆, 我地永遠都會咁愛你, 愛錫你同懷念你…. 



你的乖女兒
敬上

待續…寫到呢度, 眼淚一直流緊, 留待下次再寫吧

我好攰, 太多野要我處理同面對, 真係冇心情打blog, 坦白講, 目前我最需要關心, 陪伴同支持, 其他野...我暫時唔想聽, 唔想處理住勒

自己blog既留言, 人地blog我依然會繼續睇, 有野搵我, 就打電話或send email或留言比我啦

應承左另一同事幫手整蛋糕請大家食, 一直拖左好耐終於都整左勒, 同事們話要試新款, 所以一早就構思左呢款, 估唔到顏色都幾靚, 睇埋裡面先...

底層係海綿蛋糕, 跟住紅桑子mousse, 法式燉蛋, 藍莓mousse, 酸尾尾咁冇咁溜, 刻意中間加一層法式燉蛋, 雖然唔太食得出法式燉蛋既味, 但可中和返唔會太過酸, 可惜兩種顏色分佈得唔平均, 冇留意紅桑子mousse太多了, 好彩同事們都好鐘意, 同事們好得意, 好多時最後都會加上一句 "呢個好味, 但此終最鐘意都係藍莓芝士餅"

用剩既材料, 整左以下兩款都唔錯

迷你版士多啤梨忌廉蛋糕, 好耐冇練過抆cream勒, 未算太差, 留比媽咪食


用得太多紅桑子mousse, 所以只剩下藍莓mousse, 媽咪唔鐘意食mousse, 所以又留下我一個獨享, 藍莓mousse真係勁正啊

收左mommy 份禮物好耐, 食埋好耐都遲遲未答謝, 真係唔好意思, 難得她來香港一聚,  而我亦處於繁忙時期, 未能抽空見面, 只能透過喵喵手中收下禮物, 非常唔好意思, 期待下次有機會再見啦, 到時我一定會好好準備架, 那菠蘿卷好特別亦非常好味, 好多謝你啊


另外, 尋日亦收到大丸親手製既酒心朱古力, 好開心, 包裝亦好精美, 真係唔捨得食呀, 今日試左, 濃濃既朱古力加上淡淡既橙酒, 淡淡既苦, 正啊~好多謝你^^, 下次約我記得預早話我知啊~

今次再整呢款酸忌廉牛油磅蛋糕比以往好好多了, 呢款蛋糕即日食真係冇咁好味, 刻意0係屋企放左一日先帶返公司請同事食, 今次仲包裝好先扲返公司

佢地見到好驚喜, 話花花包裝紙好靚唔捨得開, 雖然係浪費d, 但好鐘意見到人喜悅果種感覺, 佢地仲話好好味添, 太好了, 可惜爸爸唔食得啦

好耐都冇認真咁update個blog, 因為忙於處理家中要事, 大大影響心情, 雖然事情短期內解決唔到, 亦都唔到我控制, 0係最近, 甚至推左好多朋友仔既約會, 好抱歉, 一方面要忙於照顧屋企, 另一方面真係冇心機, 望各位好朋友見諒, 曾經一度想暫停一下"泡泡茶樂園", 但一方面又想透過blog可抒發一下心情, 而且整野食亦係我最大既興趣, 0係難過既日子裡面, 一有小小既空檔, 我都會透過整野食來解壓, 放鬆下, 記得曾經有朋友對我有所提醒話 : " 唔好醒咁多蛋糕啦........" , 我亦知道有朋友曾經對我疑惑, 點解我0係呢段時間仲有心情整蛋糕呢? 其實只係我想講, 整野食對我來講係一種解壓, 整蛋糕唔等於我對其他事有所忽略, 所以, 最終都係唔捨得暫停喔

另外, 經過最近屋企所發生既事, 對我黎講有好大既啟發, 好多野真係要好好珍惜, 特別係健康同親情真係好重要, 今年古巨基首 "愛得太遲" 成為大羸家, 箇中最大既原因就係想提醒所有繁忙既都市人, 珍惜所有, 以免 "愛得太遲"啊~

呢個蛋糕已整左個多星期有多了, 亦試左新食譜, 味道同質感都一般, 未有預期般咁吸引, 下次再整另一個食譜先, 黎緊既日子"泡泡茶樂園"update進度亦會稍慢, 望各位見諒, 亦希望各位唔好唔記得我啦

最近家中有要事, 好耐冇update個blog, 多謝各位朋友常來探我, 今日剛巧可放鬆少少, 咁岩又被大丸同ter tag中, 不得不出現了

遊戲規則:  將所有愛的問題誠實地答出來, 不能說某某, 所有和不知, 答完後, 請點名8位朋友繼續下去!

寫出填寫日期: 2007年1月27日
愛的食物: 蛋糕, 卡樂b(燒烤味), 三文魚
愛的顏色: 紫, 白, 粉紅
愛的休閒: 整蛋糕, 睇電視
愛的老師: 中五教英文果位, 讀ive教b law果位(但兩個我都唔記得叫咩名:p)
愛的歌手: 古巨基
愛的個性: 坦白
愛的口頭蟬: 白痴xdddd
愛的小動作: 搓鼻
愛的季節: 夏天
愛過的人: ex
愛的人: 屋企人, 對我好既朋友
愛的節日: 新年
愛的運動: 游水, 打羽毛球(但兩樣都好耐冇做>.<)
愛的定義: 互相體諒, 互相承擔, 互相扶持, 坦誠
愛人的時間: 一世
愛我的人 : 屋企人

我要tag.....(好多人被tag左, 唔揀8個咁多了) : yumi, winnievv, alice,  tendy
因為我block了右鍵, 煩請朋友仔轉到 ter 既blog copy 格式啦
http://www.wretch.cc/blog/estheryung&article_id=5706492

最近又多返芒果賣, 真好, 有時刻意想搵但周圍都冇真係幾沮喪架, 所以趁有芒果時就練習下整d芒果既甜品, 心急買左4個, 但遲遲都未得閒整, 結果一個爛左lu, 唯有簡簡單單整兩小件芒果芝士餅啦, 以前一向用0者喱粉整芒果芝士餅, 利用0者喱粉既味帶出芒果味, 但當然唔夠天然, 口感亦覺得麻麻, 今次棄用0者喱粉, 用新鮮芒果打成蓉, 我覺得好好多啊, 淡淡芝士味加上淡淡芒果味, 裡面仲有芒果粒粒架, 個質感亦好滑, 今次都幾滿意啊, 下次再整一個大既請大家食啦, 不過最緊要就係芒果要夠甜啊, 今次略嫌差dd, 如果芒果再甜dd就好滿意勒 

Madeleines又名貝殼蛋糕, 記得岩岩學整蛋糕既時候, 已經好鐘意貝殼造型果款蛋糕架勒, 但可惜果時覺得個模太貴, 而且整既次數都未必多, 唔化算所以冇買, 最近, 吉之島10蚊店竟然有呢款模, 好開心呀, 雖然個模一次只焗到5個, 但都ok啦, 味道唔錯, 可惜個造型好唔得, 脫模脫得唔靚, 貝殼紋又唔夠深, 色水又唔平均, 不過呢個好簡單易整, 最緊要就係方便呢, 所以我一定會再整過架, 希望遲d再比個樣好d既Madeleines 比大家睇啦

小孖星~唔好誤會讀錯講粗口, 嘻嘻, 即係Litte Twin Stars 囉, 識我熟我既朋友都知道我係佢地既小fans, 小學時代印象唔深, 但中學時代已經勁鐘意, 果時已經瘋狂買佢地既精品, 筆, 擦膠, 銀包, 散紙包, 鏡, 信紙, 大大小小零碎野等等太多了, 隨著出黎做野後先慢慢減少, 但到現時為止, 每年都會keep住一定要買一本佢既schedule

一向都知道豐明銀行推出卡通信用咭, 但一向興趣都不大, 因為所出既公仔都唔係我既心頭好, 星期五cherry 話我知, 豐明銀行最近推出左Little Twin Stars 信用咭, 真係勁開心勁開心, 星期六我同妹妹就快快申請了....

過程中有好多猶豫位, 兩張咭都咁靚, 邊張好呢? 藍色有夜光星星喎!!!粉紅色又好靚喎, 最後決定妹妹要藍色, 我要粉紅色, 又有即場禮品送, 鏡同化粧袋二取其中一款, 0係好難抉擇之下, 那個好好人既promoter 姐姐見我地兩姊妹一臉童真(低b), 雙眼發光咁,  就快快手咁塞左兩個化粧袋同一塊鏡比我地, 我地仲好唔知醜咁問多句可唔可以比多塊, 哈哈, 但緊係冇啦, 不過覺得佢真係好好人啊, 其後再補齊資料後, 再多一個水樽, 又係好靚, 勁開心呀

點解咁鐘意Litte Twin Stars? 或者等我介紹下佢地兩個先, 女仔叫La La, 男仔叫Ki  Ki, 佢地係孖生姐弟, 都係12月24日出世, 姐姐喜愛繪畫作詩, 又愛哭, 最叻煲湯, 洗衣服同裁縫, 而弟弟最喜歡星星, 喜愛看佈滿蒲公英既原野, 又好奇又愛惡作劇, 從佢地既卡通畫面裡面, 見到佢地生活0係雲層上, 逍遙自在, 一時看星星, 一時拿著星星捧飛來飛去, 一時看書, 一時整野食,  雖然佢地唔係情侶, 亦超乎現實, 但生活簡單快樂, 正是我所響往既生活模式, 點解同妹妹一齊去申請? 因為我同妹妹既喜好都係一樣啊, 除左Little Twin Stars 之外, 車仔, 新幹線又係我同妹妹既心頭好, 想話唔係兩姊妹都唔得啦, 哈哈, 遲d得閒d影下屋企d收藏品比大家睇下丫

另外, 申請呢張咭, 要簽夠$2800先可以換到Little Twin Stars 焗爐, 焗多士仲可以印到佢地既樣添, 好想要, 但亦好難簽, 麻煩各位朋友仔, 要買貴野, 碌咭的話記得叫埋我, call我, 幫幫手丫, 嘻嘻, 多謝哂

做雪芳蛋糕對我黎講此終都係好撞手神, 呢個對我黎講難度真係好高, 我覺得雪芳蛋糕比海綿蛋糕更難做得好, 最近做親既雖未至於沉底, 但總有d濕濕既感覺, 究竟出左咩問題呢? 爐溫問題? 打發蛋白問題? 仲想請問各位有經驗既朋友們指導下我丫, thx~另外, 打蛋白其實需要打到咩程度呢? 濕性? 乾性? 蛋黃又點呢?

另外特別多謝jenzzz比我既食譜, 味道好正啊, 最近真係好鐘意香蕉, 總覺得比起街外既香味蛋糕來得健康同天然, 我做既雖然濕左d, 但味道我覺得好好啊, 多謝哂jenzzz

最近實在整得太多蛋糕太密勒, 有朋友問我 : 你平均一星期整幾多個??起初我諗, 邊有個個星期整呀...諗真d, 唔係喎, 我係個個星期都整喎, 仲唔止一個添, 肥死上星期同事lily生日, 我問其他同事, 仲整唔整蛋糕好呢? 因為我怕佢地食得太多太密勒, 佢地答 : "有時間先整啦, 但當然, 整係最好啦, 我地又有得食嘛?"

以前細過成日都會諗, 點解只係生日至有機會食生日蛋糕呢? 其實平時成日都可以食啦, 續漸, 我發覺自己真係好鐘意蛋糕, 除左鐘意食, 仲好鐘意整, 而且0係整蛋糕既過程裡面, 絕對可以減輕好多壓力, 亦可以舒發不安, 不快心情
唔開心既時候.............整蛋糕, 會開心d, 亦可放低痛楚
開心既時候.................整蛋糕, 可以同人地一齊分享快樂
無聊, 悶既時候...........整蛋糕, 可以打發時間
基本上一得閒, 個腦就會好自然會諗.....整咩蛋糕好呢??? 而家, 甚至連我d同事們都比我攪到, 唔係生日都成日食蛋糕, 好似好變態啊,  銀包上仲有同事們比我既基金未用, 好想快d整埋佢, 但又怕........真係太密太密啊~~~

今次lily生日試左個新食譜~蘋果慕絲蛋糕......但但但.....今次真係做得好差啊, 莫非天氣太凍真係好好難整mousse 既???(我姓賴嗎???)本來攪得個糊都好好, 幾滑既, 倒了1/3入模, 跟住放d蘋果粒粒, 放完再倒既時候發覺.......已經由原本好滑既流質狀開始凝固緊變成一pat pat lu, 唉, 鋪極都唔平, 脫模時簡直...無眼睇, 好彩屋企仲有d手指餅(本來諗住留返黎整tiramisu架嘛)用黎遮醜, 同事們話下次唔使遮, 0徙哂d手指餅, 唔得, 我過唔到自己果關唔敢拎出黎啊, 味道方面亦唔太好, 可能我抱得太大期望, mousse只有紅茶味, 冇蘋果味, 同埋太淡, 同事們話唔太甜岩岩好, 但以茶來做mousse就唔太喜歡, 而裝飾方面, 亦冇太多時間準備, 求其多d, 果日6點半起身才脫模, 見有剩d士多啤梨餡又幾襯色(我自己覺得)就放埋上面遮遮醜, 同事話d士多啤梨餡好味, 可惜佢既味完全遮蓋哂蘋果紅茶味呢, 下次再努力吧, 好彩今次唔係請全公司食哂, 唔係真係唔好意思, 咁失禮...

公司大部份同事都好喜愛食蛋糕, 正好助長我不斷練習整蛋糕既動力, 繼上次有同事贊助我整蛋糕返公司請同事食, 今次又有另一同事贊助我, 佢地話成日食我整既蛋糕唔好意思喎, 其實我只係借助佢地既口做白老鼠0者, 嘻嘻, 唔使太客氣, 太計較, 好多時整得較差佢地都好俾面嘗試同掃清, 我已經好開心, 亦都好多謝佢地

不過應承幫人整, 總係覺得好大壓力, 今次整呢個蛋糕亦做得比上次差(唔知點解第一次總好過第2次架呢, 哈哈), 魚膠粉多左少少, 亦唔夠滑, 有同事食到好勁蕉味, 有同事話冇乜蕉味(點解咁大差異!!!!!), 但我個人覺得, 有蕉味, 但就唔及上次好味, 此終要用出哂班點既香蕉係最香濃好味既, 不過呢款蛋糕係好合我口味, 我自己好鐘意, 所以今次特別推介比同事們, 有同事覺得好新鮮, 好好味, 佢地問出面有冇呢款蛋糕架?未聽過亦未試過, 但都好鐘意, 亦有同事馬上order叫我幫佢整, 但亦有同事唔鐘意呢款蛋糕味, 亦有同事嫌呢個蛋糕唔夠芝士味, 這個當然啦, 賣點不在於芝士嘛, 相反, 我那個唔愛芝士既妹妹反而食到呢個蛋糕, 太好了


今次還多出了一小杯, 為食既我留返比自己慢慢嘆, 哈哈
又有同事叫我再整蛋糕, 今次叫我試整新款, 唔好翻炒喎, 佢地想好似今次咁試新野, 嗯.......各位比d意見我, 整咩好呢?????

蛋白雪芳蛋糕, 又名--天使蛋糕, 好鐘意呢個名, 好鐘意白雪雪軟綿綿既感覺, 早前0係mabel度見到呢個蛋糕, 就好想快d試下整, 因為最近成日整蛋糕用剩好多蛋白呀, 蛋白又諗唔到整乜好, 所以整呢個就岩哂, 而且又健康, 可惜我做得唔太好, 雖然冇沉底, 但入口有種濕濕既感覺, 而且蛋白既味道對於我黎講都係麻麻, 我較喜歡濃濃蛋味既感覺多d, 不過, 我下次會再整架, 希望整得好d, 因為老豆竟然食哂, 哈哈
特別鳴謝mabel 既蛋譜啊,thanks!

新既一年又開始, 0係度先祝大家新年快樂, 最最最緊要就係身體健康, 仲有就係.....搵多d搵多d搵多d搵多d, 嘻嘻

聖誕節0係同事家既聚會裡面, 囡囡們其實都有份參與架(好彩屋主好人唔收佢地人頭費), 我仲為佢地悉心打扮, 以補償好耐都冇幫佢地影靚相既損失, 同事屋企有棵咁靚靚既聖誕樹, 最岩幫佢地配襯做背景呀

我的pinky 集相園 : http://www.fotop.net/bubblestea/Pinky (集相園)

佢地既衫仔, 頸巾, 髮飾靚嗎? 特登聖誕前早兩晚為佢地整架


睇睇後面, 仲有我最滿意既天使翼, 哈哈, 下年再做多d先


果日好開心, april既朋友仔敏敏畫左張pinky畫送比我, 好開心, 好靚呀, 多謝哂


睇真d


呢度唔post太多相勒, 喜歡既就入我相簿睇丫
我的pinky 集相園 : http://www.fotop.net/bubblestea/Pinky (集相園)